خود اعتمادی کیسے بڑھائیں Increase Self Confidence

  Increase Self Confidence-خود اعتمادی کیسے بڑھائیں

 Increase Self Confidence-خود اعتمادی کیسے بڑھائیں

خود اعتمادی سے نہ صرف آپ اپنی زندگی کوسنورتے ہیں  بلکہ اس سے  آپ کی شخصیت کو بھی دوگنی طاقت ملتی ہے ۔ آپ جس قدر بھی ڈگریاں رکھتے ہوں اور صلاحیت وقابلیت کے مالک ہوں، اگر آپ میں خود اعتمادی کی کمی  ہے تو یہ بات جان لیںکہ یہ ساری ڈگریاں اور قابلیت بے کار ہے  ۔کچھ لوگوں میں خوداعتمادی کی کمی بچپن ہی سے ہوتی ہے تو کچھ میں وقت کے بدلتے حالات اور زندگی کے تلخ تجربوں کی وجہ سے خود اعتمادی میں کمی آجاتی ہے ۔اگر آپ میں بھی خود اعتمادی کی کمی ہے تو ان چند باتوں پر عمل کر کے آپ اپنی شخصیت میں خود اعتمادی لا سکتے ہیں۔

خود اعتمادی کے دھوکے میں نہ رہیں

کچھ لوگ باہر سے بظاہر بہت خود اعتماد دکھائی دیتے ہیں لیکن اندر سے ان میں اعتماد کی کمی ہوتی ہے۔ اسے ڈاکٹر روب ’’ خود اعتمادی کا دھوکا‘‘ قرار دیتے ہیں جب کہ اس کے لیے پہلا قدم یہ ہے کہ خود کو اندر سے پُراعتماد سمجھنے کی مشق کرتے رہإ کریں اور اس کے لیے زندگی کے وہ چیلنج اور مشکل حالات یاد کریں جن پر آپ نے اپنی محنت اور لگن کے ذریعے قابو پالیا تھا۔

پُرکشش گفتگو
گفتگو کا ہماری شخصیت پر بڑا اثر پڑتا ہے ، کسی کو متاثر کرنے کے لیے ہماری باتیں بہت معنی رکھتی ہیں ، عمدہ گفتگو  سے نہ صرف ہم لوگوں کا دل جیتتے ہیں بلکہ اپنے اندر ایک پختہ یقین بھی پیداکرتے ہیں ۔بہترین انداز گفتگو  سے محروم ہونے کے باعث ہم دوسروں کے سامنے اپنے خیالات پیش کرتے ہوئے جھجھک محسوس کرتے ہیں ۔نتیجہ کے طور پر ہمارے اندر سے خوداعتمادی کا معیار گرنے لگتا ہے ۔ اور اس سے نجات پانے کا اچھا طریقہ یہ ہے کہ جب آپ بولنا چاہتے ہوں تو موضوع سے متعلق پہلے پوری معلومات جمع کرلیں اور اسے ذہن نشین  کرنے کے بعد عمدہ گفتگو  اور بہترین اسلوب میں بات بیان کرنے کی پریکٹس  کریں ۔

خود پر رحم کریں

انسان خطا کا پتلا ہے لیکن یہ بھی تو سوچیں کہ آپ کے دوست، رشتہ دار  آپ کی اچھائیوں اور کام کرنے کے جذبے کو بھی سراہتے ہیں۔ اسی لیے ماہرین کا مشورہ ہے کہ آپ خود بھی اپنے آپ پر رحم کھائیں لیکن سست اور بے عمل نہ ہوں۔ آخر آپ بھی انسان ہیں اور ماضی میں کئی کارنامے انجام دے چکے ہیں۔ اپنے اچھے کاموں کو سوچ کر خوش ہوں اور ساتھ ہی ماضی کی غلطیوں سے بھی سیکھیں اور مستقبل کے بارے میں پرامید رہیں۔

کوئی بھی انسان مکمل نہیں ہوتا
اس بات میں حقیقت ہے کوئی بھی انسان مکمل نہیں ہوتا لیکن  ہرانسان کے اندر پوشیدہ  صلاحیتیں ہوتی ہیں جنہیں اجاگر کرنے کی ضرورت ہے ، اگر انسان اپنے اندر موجود اس ہنر کو ڈھونڈلے تو وہ زندگی میں بے پناہ لطف ومسرت سے مالامال ہوسکتا ہے ۔ اور اپنی اسی خوبی کی بدولت لوگوں کے دلوں میں ہی نہیں بلکہ معاشرے میں بھی اپنی علیحدہ پہچان بنا سکتا ہے ۔ اس لیے اپنے اندر چھپی ہوئی خصوصیات کو تلاش کریں ، یہ آپ کے ليے قدرت کا انمول تحفہ ہے ،لیکن اس کے ساتھ ساتھ اپنی خامیوں اور غلطیوں میں سدھار بھی ضرور کریں۔ اگرآپ  اس بات کو ذہن نشیں رکھیں گے تو آپ کے اندر یقین کی خوبی  پیدا ہوجائے گی اور یہی یقین کامل آپ کی خوداعتمادی کوبحال کرنے میں کارگر ثابت ہوگا۔



خود کو کمتر مت سمجھیں
اکثر  لوگ خود کو کمتر سمجھتے ہیں ، اور دوسروں سے متاثر ہوتے  رہتے ہیں ،دوسروں کی عزت کرناغلط نہیں ہے لیکن  خود کو نظرانداز کرنا اور خودکو احساس کمتری کا شکار بنالینا بہت غلط ہے ۔اس ليے اپنی اہمیت کو سمجھیں ،اپنی زندگی، احساسات ،اور اپنی ضرورتوں کا بھی خیال رکھیں۔ساری خوبیاں ایک انسان میں نہیں ہوسکتیں ،انسان جس قدر بھی کوشش کرلے ‘ نہ تو وہ سارے کام کرسکتا ہے اور نہ ہی ہر فن مولا ہوسکتا ہے ۔لہذا جس فن میں دلچسپی ہو اس میں خوب سے خوب تر  مہارت حاصل  کرنے کی کوشش کریں۔ یہ چیز  آپ کے اندر خوداعتمادی پیدا کرنے میں اہم کردار ادا کرے گی ۔

ورزش سے اعتماد حاصل کریں

ورزش اور جسمانی مشقت سے بدن خاص قسم کے ہارمون خارج کرتا ہے جو نہ صرف اعتماد بڑھاتے ہیں بلکہ دل و دماغ کو سکون بھی فراہم کرتے ہیں۔ صبح اٹھ کر 40 منٹ واک کرنے سے ڈپریشن اور ذہنی تناؤ دور ہوتا ہے۔ آپ کوشش کریں خود میں مستقل طور پر ورزش، واک یا جسمانی مشقت کی عادت پیدا کرلیں۔ اس سے جسم پر ظاہری اور اندرونی دونوں طرح کے مثبت اثرات مرتب ہوں گے  اور آپ کا دوران خون بھی بہتر رہے گا اسی لیے خود اعتمادی بڑھانے کے لیے جسمانی محنت کو خاص اہمیت  حاصل ہے۔